Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Fritz Reuter

Läuschen un Rimels

Wat ded´st Du, wenn Du König wirst?

Twei Jungens, unsen Schulten sin
Un Krischan Block, dei dunn bi’n Preister deint,
Dei hödden eins de Faselswin.
Sei hödden jeder irst allein,
Doch durt’t nich lang’, dunn wiren s’ beid’
Mit ehre Haud tausamen up de Scheid’,
Un dunn, as so’ne Jungs nu sünd,
Dunn leten s’t Veih taum Düwel lopen,
Un kröpen gegen Regen, gegen Wind
Beid’ achter’n Durnbusch ganz dicht tauhopen.
Na gaud! Un hir verkröpen s’ sick en beten.
Denn regen ded’t in vullen Gœten.
"Hür, Krischan," seggt nu Schulten=Lute,
"Ick krig’ mi nu min Pip herute." –
"Ick ok!" seggt Krischan, "so’ne Pip Toback,
Dat is doch glik en annern Snack,
As dat verdammte Swingehäud’
För de por Gröschen, de Ein kriggt."
Na, dat was gaud! Sei steken beid’
’Ne Pip Toback sick in’t Gesicht. –
Toback tau roken, is för so’ne Bengels
En grot Plesir, dat is gewiß,
Un wenn dat ok man Tüstenstengels,
Un wenn dat ok man Feldblœm is. –
Sei roken nu woll, will un bet,
Un wiren beid’ recht in ehr Fett
Un freu’ten sick, dat sei noch gor nich natt,
Vertellten sick von dit un dat:
Wo oft sei in de Appeln stegen,
Wat sei des Middags hadden eten,
Wat sei des Dags an Taubrod kregen,
Wat ehren Herrn för Schäw sei reten;
Wat Jochen säd’, un wat säd’ Fiken,
Un wat sei sülwst dunn seggt, un wat säd’ Dürt,
Un wat sei hir un dor bi ehres Gliken
In’n ganzen Dörpen hadden hürt;
Un dat de Schult den Knecht hadd slagen,
Un dat de Knecht den Schulten wull verklagen;
Sei wullen sick gewiß nich slagen laten,
Sei brukten dat tau liden nich von Keinen,
Sei wullen för kein Släg’ nich deinen,
Ne! leiwerst würden sei Soldaten.
Un von Soldaten kemen s’ up den König.
"Je, hür," seggt Lute, "so en König,
So’n König, Krischan, is nich wenig,
So’n König, dei schrecklich rik,
Un Allens möt gescheihen glik,
So as hei man de Hand ümkihrt.
So’n König is en grotes Dirt!
So’n König".... "Na," seggt Krischan, "segg mal irst,
Wat ded’st Du, wenn Du König wirst?"
"As ick? Ick? Wat ick ded’?" seggt Lute
Un treckt drei Paff ut sine Pip herute
Un kek so stolz ümher, as set de Kron
Up sinen Flaßkopp all, un hei up sinen Thron.
"Dat will ’ck Di seggen. Wenn ick König wir,
Ick hödd mi Swin man blot tau Pird’." –
"Ne, so ’ne Dummheit heww ’ck meindag’ nich hürt,
Wer Di för klauk köfft, dei ward angeführt,"
Seggt Krischan Block. "Dat nimmt mi Wunner!
Ne, ick! Wenn ick so König wir,
Denn rokt ick keinen Toback mihr,
Denn rokt ick nicks as luter Tunner!"
"Du büst woll ok nich klauk!" seggt Lute....
Dunn kamm uns’ Schultenvader acher’n Durnbusch ’rute,
In sine Hand en Schacht en rechten löhnigen:
"Täuw, Rackertüg! täuw, ick wull Jug bekönigen!
Will’n Ji woll dauhn, wat Jug is heiten?!
Kikt dor mal hen! De Swin sünd in den Weiten!
Ji Rackertüg! Ji rokt mi all Toback?!"
Un ob sei noch so knendlich beden,
Raps! raps! tellt Schultenvader jeden
En richtig Dutzend in de Jack.
"Ji Snœsels! Ji willt König sin
Un lat’t de Swin in’n Weiten ’rin?"