De doa moet slawen Nacht un Tag
Wil dat de Anne slöppt
To don Nicks brukt un ok nich mag, –
Dat 's grar as en dat dröppt.

Hans treckt sin Klott un makt sich krümm,
Wenn oll dumm Krischan röppt,
Un Hans hett lirt wat – na, wurüm? –
Dat 's grar as en dat dröppt.

Din ganze Forst schütt rank un slank,
Min enzigst Wir wad kröppt . . .
Doa lett sick Nicks bi don, seggt Pank,
Dat 's grar as en dat dröppt.

De En de kriggt 'ne güllen Kron,
De Anne de wad köppt,
Un denten beir foer 't sülwig Lon, –
Dat 's grar as en dat dröppt.

Di bringt dat grote Loß de Jur
In 't Hus, wil mi he schröppt,
Dat wast nu Graf un ick bliw Bur, –
Dat 's grar as en dat dröppt.