– Ne, wu flitig! ne, wat 'n Flit!
Nawe, so wat lewt nich!
Dat 's nu glik nachtslapen Tit,
Man Ji aewegewt t' nich! –

– – Nawesch, je dat 's as dat is,
Dat sünd hochbent Joaren!
Schillingssteg is Dalesweg,
Wen Nicks hett moet spoaren. – –

– Wat en ment un wat en seggt,
Nawe, sünd twe Saken;
Ji hewt got wat voer Juch bröcht,
Brukt nich mir to raken! –

– – Wat en foer sick sülm nich deit,
Deit en foer sin Goeren! – –
Doamit füng he werre an
As en Kirl to boeren;

Tröck un schoew un schoew un tröck, –
Sur würr 't den Ollen.
Sur, – bet he voer sin Lock
Mit sin Schuwkoar hollen.

– Na got Nacht ok, Fru Quadux! –
– – Got Nacht, Scharpenwewe! – –
Dunn tröck he sin Schuwkoar na
In sin Lock an 'n Aewe

– Gott ne ja! Na, voer sonn En
Mak ick Krüz un Segen! –
Sar dunn Fru Quadux un is
In ern Pol 'rinstegen.

Voß harr 't hürt un grint un sär:
– Slachte, Garwe, Schinne
Sünd vun Anno Toback her
Swestebroerekinne! –