U'f' näs Haasämööhli.

Arms Häsli! weist du au, worum
Die Herrä z'sämä sitzid,
Und's Mul (mä g'sehd wohl, 's ist nä drum)
So nooh dim Fleischli spizid?
Bist doch äs friedlis Thierli gsy:
Und 's ander Vehli groß und chli
Hest eister lo passierä.

Kei Moralist im schwarzä Rock
Schmält dich mi guotä G'wüssä,
Ist's eint und andre Chabisstock
Den du, us Noth, verbissä;
Sä 'n ist das nur ä Wiberchlag,
Die d'Gerechtigkeit uf ihrer Waag
Joo nur als Null lood geltä.

Was haftid dä – du armes Thier!
Uf dir für schlechti Thatä?
Was hest verbracht, daß Offizier
Dich schindä'n und halb bratä,
Und halb dich frikassierä lönd.
Wie Hungerlider z'sämä stönd,
A dina Beinä z'nagä?

Und daß sogar, by dießem Akt
Nu d'Heerä sich dri mischid,
Als wenn sie alls, im glichä Takt,
Was d'Offizier uf tischid,
Das G'fischet und das G'schossä glich
In ihres Mul, in Ihri Büüch
Au müößtid iquartierä?

Di Sünd, die du begangä hest
Will ich dir scho erchlärä.
Im Schwizerim (die liebä Gast
Hend nüüd uf g'lehrtä Mährä)
Mi Häsli! die begangni Sünd,
(So deponierid siebä Hünd)
Ist nüüd, als 's bös Exempel.

Mä hed di oft i Schlachtä gseh,
Und allimal bist g'wichä.
Vor jedem chlinä Federveh,
Vor Spatzä hest di g'strichä;
Hest jedem Find dä Rückä kehrt.
Wo chlini Güggel sich nu g'wehrt.
Und sich vertheidigt hättid.

Das – Häsli! hend die Herrä hie
A dir nüd chönnä lidä.
Amtswegä dörfid s ufem Flieh
Nüüd haa – und das z'vermidä.
Daß keinä zo dir fluchtä lehr,
Wo's heißt: stand fest! und bruch dis G'wehr!
Hend s' über dich abg'urthlet:

»Es söll dem Haas« – du armä Tropf!
Wie wirst du dich geberdä!
»Si Huut und 's Pelzli üb'rä Chopf
Ringsum abzogä werdä –
Und so als g'schundnä Bartlimä
Soll er vor üs als Fricassee,
Und Brootis paradierä.«

Das Urthel hed au d'Geistlichkeit
(Das bös Exempel z'midä)
By aller ihrer Heiligkeit
Vo Herzä mögä lidä.
Ist so dem Haas sis Urthel g'fällt,
Muoß er, lut Spruch, ab dießer Welt;
So griffid zuo! ihr Herrä!m

*