Wa smeckt de Pip wul prächti!
Wat makt he'n schewe Snut,
Un snuggt tohöch, un mächti
Spiggt he denn sitwarts ut.

He is værwahr en Knewel!
Veer Fot un doch keen Knast.
Wa blank is nich sin Stewel!
De Föt so rech værdwass!

Veerschröti – as en Snider,
Wallbeenti as en Tachs,
Mit Swewelstickenglieder,
Mit Keben as en Lachs.

Hett Ogen rund as Hagel,
En Farv as Bottermelk,
He danzt di as en Vagel,
Un supt di as en Elk.

Hemdsmaun, un eben hekelt,
De Börsten in en Tut:
Süh, wa he wichti schrækelt,
As dach he Böker ut!

He lett de Steweln glinstern
Un blas't den Rok inn Wind. –
Jüm Dierns in de Finstern,
Kikt jüm de Ogn ni blind!