Jüm schrivt mi, dat dat Korn gut stan deit,
Un dat Jüm lütt Jan Paul al gan deit,
Un dat Jüm Psepter de Junges slan deit,
As weert nix Guds,
Un dat Jan Discher bi Jüm wahn' deit
Int Achterhus.

Plünn Antje hett mi letz de Breef broch,
Un hett mi seggt, de Püttjer lev noch,
Un sin Jan Hinnerk weer de Sleef noch
Vun fröher her,
Un all dat Nies, wat sunsten gev noch,
Vun Em un Er.

Dat 's ditmal Allens, wat ik weten do,
Opn anner Mal mehr, wenn'k wat vergeten do;
Plünn Antje bringt ok noch en Beten to
Jan Paul sin Mund.
Gott gev Jüm, wat ik wünsch un beden do:
Blivt All gesund.