Dämm’rig werd’s im Wertshauszimmer,

Un kä’ Mensch is drin zu blicke,

Meisjeschtill, mer siecht fast nimmer,

Blouß die Wanduhr hert mer ticke.

Awwer hinne drin im Winkel

Hocke zwä ganz schtill un schtumm,

Un sie raache, un sie trinke,

Un die Tabacksdus’ gäiht rum.

Schläfrig hocke se zwä Schtunne,

Un kä änziger redt e Wort,

Lang is scho’ die Sunne drunne,

Un sie trinke als noch fort.

Da uff ämol fängt der Äne

An un trummelt uffn Tisch

Leis mit seine dicke Finger

Schtill un schtumm ’n Zappeschtrich.

Un de anner raacht als weiter,

Guckt ’m erst e Weilche zu,

Bis ’n endlich des Getrummel

Arg schenniert in seine Ruh’.

Erscht, do guckt er ’n an verdächtig,

Wie der als nit uffher’n will,

Un dann säigt er ganz bedächtig:

»Halt dei Maul!« - - Da is er schtill. - -

Finster werd’s im Wertshauszimmer,

Un kä’ Mensch is drin zu blicke,

Meisjeschtill, mer siecht kän’ Schimmer,

Blouß die Wanduhr hert mer ticke.

Awwer hinne drin im Winkel

Hocke zwä ganz schtill un schtumm,

Un sie raache, un sie trinke,

Un die Tubacksdus’ gäiht ’rum.