Wir sein zwä ruhige alte Leit’,

Ganz glicklich un vergniegt,

Doch hawwe mer die lange Zeit

Halt gor kä Kinner ’kriegt.

Un wou kä Mädche is, kä Bu’,

Da is es schtill im Haus,

Un werd mer alt aach noch dezu,

Dann siecht’s halt traurig aus.

»Wenn ich ner ebbes um mich hett’«,

So knengt mei’ Fraache frieh un schpät;

»So sei ner still, mei’ Weibche,

Ich bring’ der ’was, mei’ Deibche.«

Ich setz’ mei’ alte Kappe uff

Un laaf, was ich kann laafe,

Zum alte Vochelschuster ’nuff:

»Ich mecht ’n Fuchel kaafe!«

»Der junge Horzer, guck wie schö!

Der singt der ungelouge

In verzeh’ Tag ganz wunnerschö’!

ich hab’n uffgezouge.«

»Singt er aach werklich?« »Ganz gewiß,

Wenn er drei Woche älter is,

Dann kriegt er aach e Heibche,

Grad’ wie es Dorteldeibche.«

Ich hab’n in mei’ Sacktuch gepackt

Ganz zortche un ganz fein,

Dann hab’ ich mer ’n Keffich kaaft

Un duh’ des Tierche ’nein;

Mei’ Fraache is ganz newwe draus

Vor lauter Glick un Fräd’,

Mir schtäihn mitsamm’ vor’m Vochelhaus

Zu zwätt von frieh bis schpät.

Ich schteck aach in ’n Keffichritz’

In saft’ge sieße Appelschnitz’

Un wart’ dann mit mei’m Weibche

Uff’s Singe un uff’s Heibche.

Am erschte Tag, da hot er blouß

Zum Appelfresse Zeit,

Am zwätte gäiht es Pfeife lous,

Doch nach de falsche Seit’

Am dritte hot er »Piep« gemacht:

»Horch, Fraache, er macht ’Piep’!«

»Is wohr? Wääß Gott, mei’ Tierche piepst.

Mei Hänsje, nä, wie lieb!«

»Pst! Biste schtill mit dei’m Geschrei,

Un stör’n nit, sunst werd er scheu,

Sei schtill, mei’ liebes Weibche,

Sunst kriegt er mer kä Heibche!«

Ja, sou’n Fuchel braucht sei’ Zeit,

Er muß sich eingewöhne,

Dann singt er scho’, un dann kummt aach

Des Heibche bald, des scheene.

Des Vechelche, des is nit schuld,

Des kammer halt nit zwinge,

Drum wart’, mei’ Weibche, nor Geduld,

’s Hänsje werd scho’ singe.

Ich glaab’, er is jetz’ in de »Maus«’,

Mir schtäih’n mitsamm vor’m Vochelhaus,

Ich wart’ als mit mei’m Weibche

Uff’s Singe un uff’s Heibche.

Jetz’ warte mer es ganze Johr,

’s Hänsje will nit schlage,

Des kummt mer doch uffällig vor,

Ich muß ’n Schuster frage.

Er singt halt nit, der Sackerdie!

Des is zum narrisch wer’n!

Was hilft’s, wenn ich ’n pfeife seh’,

Ich mecht’n pfeife her’n!

Am End’ sein mer gor selber schuld!

Ich schtäih’ vor’m Keffich mit Geduld

Un wart’ als mit mei’m Weibche

Uff’s Singe un uff’s Heibche.

Jetz’ warte mer es zwätte Johr,

Mei Hänsje will nit schlage!

Gell Bubche, du kannst nix defor,

Un ich, ich kann’s ertrage!

Ich mään’ alleweil, ich mään’ alleweil,

Der Fuchel kriegt kä Heibche,

Un wenn er lang so weiter macht,

Dann werd er noch e Weibche!

Da, haste noch ’n Appelschnitz!

Ich schtäih’ als da un spitz’ un spitz’

Vor’m Keffich mit mei’m Weibche,

Vor’m Weibche ouhne Heibche!