Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Hans Staden

Warhaftige Historia

Wie sie eynen schlauen vnter sich hat=
ten / welcher mich stets belog / hette gerne gesehen /
das sie mich bald getoedtet hetten / derselbige
wuerd getoedtet vnd gessen / in meiner ge=
genwertigkeyt.   Cap. xl.

SO war nun eyn schlaue vnter jnen / der war eyner Nation die heyssen Carios / vnnd seind auch der Wilden feinde / welche der Portugaleser freunde sein / derselbige war der Portugaleser eygen gewesen / vnd war jnen darnach entlauffen. Solche toedten sie nicht so zu jnen lauffen / es sei dan das sie sonderlich etwas verbrechen / sondern halten sie fur jr eygen / vnd muessen jnen dienen.

Derselbige Carios war drei jar vnter diesen Tuppin Jnba gewesen / vnd sagte / Er hette mich vnder der Portugalesenrn gesehen / vnd ich hette etlich mal vnter die Tuppin Jnba geschossen / wann sie dahin zu kriege weren kommen.

So hatten nun die Portugaleser vor etlichen jaren jrer Koenige eynen erschossen / welchen koenig / sagte der Carios / hette ich geschossen / vnd reget ymmerdar an / man solte mich toedten / dann ich were der rechte feindt / er hette es gesehen / vnd er loge es doch alles mit eynander / dann er war drei jar da vnter denen gewesen / vnd es war erst eyn jar vergangen / das ich gehn Sancto Vincente kommen war / da er entlauffen war. Vnd ich batt Gott stets das er mich woelte vor den luegen behueten.

So begab es sich vngeferlich im jar 1554. den sexten monat / so ich geredts gefangen war / so wirt der Cario kranck / vnd sein herr so jnen hatte / batt mich Jch solte jm helffen / das er wider gesundt wuerde vnd Wildt fienge / das wir etwas zuessen bekemen. Dann ich wuste wol / wann er jm etwz braechte / da gebe ere mir auch von. Aber so mich deuchte / das er nicht wurde widerumb gesundt werden / woelte er jnen eynem gûten freunde schencken / der jnen todt schluege vnd eynen namen an jme gewuenne.

So war er bereydts vngeferlich neun odder zehen tage kranck gewesen / so haben sie zene / seind von eynem thier / welches sie nennen Backe / Den selbigen zan wetzen sie scharffe / vnd wo sie dann das gebluet hindert / da schneiden sie mit dem zan vber die haut her / da lauffet das blût herauß / das ist so vil / als wann man hie eynen koepffet.

Derselbigen zene nam ich eynen / meynte jme damit die Median ader zuschlagen. Aber ich konte sie nicht mit durch stechen / dann der zan war zustumpff / vnd sie stunden vmb mich her. Wie ich nun wider von jm gieng / sahe das es keyn nûtz war. Fragten sie mich / ob er widerumb wuerde gesundt werden. Jch sagte jnen: Jch hette nichts außgericht / es were keyn blût herauß gelauffen / das hetten sie wol gesehen. Ja meynten sie / er wil sterben / Wir woellen jnen / ehe dann er stirbet todt schlagen. Jch sagte / neyn thuts nit / er wirt villeicht widerumb gesundt werden. Aber es halff nichts / sie zogen jn vor des Königes Vratinge huetten / vnd jrer zwen hielten jn / dann er war so kranck / das er nicht wuste was sie mit jm thun wolten. So kam der dem er gegeben war todt zu schlagen / vnd schlegk jn auff den kopff / dass hirn herauß sprang / darnach liessen sie jnen leigen vor der huetten vnd wolten jn essen. Jch sagte / Das sie es nit theten / es were eyn krancker mensch gewesen / sie moechten auch kranck werden. Also wusten sie nicht was sie thun wolten. Doch kompt eyner auß der huetten da ich inne war / vnd rieff den weibern das sie eyn fewr bey den todten machten / vnd er schneyd jme den kopff abe / Dann er hatte eyn auge / vnd scheyn heßlich von der kranckheyt so er gehabt / das er den kopff hinweg warff / vnd dem coerper sengete er die haut ab vber dem fewr. Darnach zerschneyd er jn / vnd teylete mit den andern gleich / wie jre gewonheyt ist / vnd assen jnen biß auff den kopff vnd daerme / da hatten sie eynen eckel an / dweil er kranck gewesen war.

Darnach gieng ich hin vnd wider durch die huetten / in der eynen brieten sie die fueß / in der anden die hend / in der dritten stuecke vom leibe. Da sagte ich jnen / wie das der Cario den sie da brieten vnd essen wolten / hette mich alle zeit belogen / vnd gesagt / Jch hette ewerer freund etlichen / dieweil ich bei den Portugalesern gewesen were / erschossen / vnd es were erlogen / dann er hette mich nie gesehen. Nun wisset jr wol / das er ist etliche jar vnter euch gewesen / vnd nie kranck worden / yetzt aber der luegen halben so er auff mich gelogen hat / ist mein Gott zornig worden / vnd jnen gekrencket / vnd euch in den sinn geben / das jr jnen getoedtet habt vnnd jnen essen solt. Also wirt mein Gott mit allen schelcken thun / so mir leydt gethon haben vnd thun werden. Für solchen worten erschracken jr vil / das dancke ich dem allmechtigen Gott / das er in allen so gewaltig vnd genedig sich mir erzeygte.

Bitte dero halben den Leser das er wölle achtung haben auff mein schreiben / Dann ich thu diese muehe nit der gestalt / das ich lust hette etwas newes zuschreiben / sondern alleyne die erzeygte wolthat Gottes an den tag zubringen.

So neygte es sich nun zû der zeit / das sie wolten zû kriege zihen / Darauff sie sich drei monat zuuorn geruestet hatten / so hoffte ich stets / wen sie außzoehen / solten sie mich mit den weibern daheyme lassen / wolte ich / dieweil sie aussen weren / entlauffen sein.