Die Montag hat er allesamm
Rot im Kalender drinn;
An dene Tag bringt er nix z'samm,
Wenn er's aa hätt im Sinn.

So kummt aa heut scho in der Fruah
Zum Furtnerbräu er nei –
»Aha – sagt der, wia er 'n siecht –
Der Montag g'hört halt dei!«

»Na, Bruder,« sagt der Uhrensepp,
»Dö Sach is anders heut;
I war scho an der Arbeit dro,
Weil' s wirkli mi hätt g'freut.

Da fallt mir, wia i anfang grad,
Dös feinste Radl hi';
Zum Packa – weil dös so net geht –
Suach nach der Zanga i.

Doch wia i dö na nemma will,
War's mit mei'm Eifer gar;
Denn – iatzt no graust mir – nebendroo
Find i a Mordstrumm Haar.«