Im Holz san s' heut so narrisch letz,
Der Ochs vor Schmerzen brüllt;
Doch wia er sieht, daß dös nix hilft,
Do wird der »Mulli« wild.

Er hebt 'n Schwoaf und reißt no aus,
Kehrt si' aa gar net droo,
Daß hint sei Herr am Loatsoal ziagt,
So viel er ziag'n koo.

A Rad geht roo und d' Deixel kracht,
Do denkt der Wastl si':
Na, Brüaderl, do laß i scho aus,
Do wur i gar no hi'.

»Laff zua, du Rindviech!« schreit er laut,
»Du konst zum Teufi geh,
Der G'scheider, woaßt, du Ochs, gibt nach« –
Do bleibt der »Mulli« steh.