Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Dreikünigseck.

Eine Sage aus dem Vogtland.

Weit in ne ferne Vugtland draußen,
Halb zwischen Eemet und Pusseck, Ebmath und Posseck.
Wu heit noch hȧȧmlich Pascher hausen,
Dort macht de Grenz ȧ scharfes Eck,
– Schau ner de Kart, do findst'es gleich –
Dort stußen z'samm drei Künigreich.

Se hȧȧßen Bayern, Bähm' und Sachsen,
Ȧ hȧrrlichs Fleckel, könnt m'r'sch glȧȧm,
Wu liebe, schiene Mȧȧdle wachsen
Und Börschle, stramm als wie de Bȧȧm,
Wu rȧngtlich schimmern Wald und Flur,
Kȧȧ Ruß, kȧȧ Stȧȧb, kȧȧ Unatur.

Dort vun den Eck derziehln de Alten,
Es hätten in vergangner Zeit
Ȧ mol Zesammekumft gehalten
Drei Künig dort mit ihrn Geleit.
Es wär viel hunnert Gahr scha her,
Kȧȧ Mensch wüßt ihre Näme mehr.

Zeletzt ham nooch der Sog se 'gessen
Drah ȧn'n Tisch dort af freie Feld,
Und in sȧn'n Land hot jeder g'sessen,
Su hatten se de Stühl gestellt,
Und fersch Geleit derhinner stand
Ȧ Reihe Tisch in jeden Land.

Und nu gahngs orntlich eich zefoden,
Und viele Diener schlȧȧpfen zu.
De Sachsen, die krieng Sauerbroten
Und grügeniffte Kließ derzu.
Ze trinken gobs, herrjehm'r'schnee
Ȧn'n Meißner Blümmelekaffee.

De Bayern, die krieng Leeberkneedle
Ost mit Geselchten und mit Kraut
Und Fetzen Flȧȧsch wie Schubkarrnreedle!
Und aß m’r alles schie verdaut,
Do schänkt ȧ Fässel Bier m'r ȧus
Ost aus ne Münchner Hufbräuhaus.

Backhähndle ober krieng de Bähme
Mit Heffenknüdlen aufgetroong,
Und braung dermiet siech net ze schäme,
Backhähndle is wos guts fer'n Moong!
Ȧ Wei, mehr billig als wie gut,
Der ihne'n Dorscht schie löschen tut.

Es schmeckt, und noong'e Schmaußen singe
Se mannigs Lied mit voller Kraft.
De Schälle klirrn, de Gleeser klinge
Afs Wuhl der g'schlossne Bruderschaft,
Und stets, wie heit, wölln lieb und trei
Siech Bayern, Bähm und Sachsen sei.

Und su, wies dorte wur beschlossen,
Su is es bis af heit gebliem:
Togteeglich werd der Bund begossen
Noch in ne Kaiserhammer drühm,
Wu Sachs und Bȧhm und Bayer trinkt,
Manch lustig Lied zen Himmel klingt.

Grenzgeeger, Pascher und Zigeiner,
Die trinken Kaffee, Bier und Wei,
Schandarm und Stromer, mannig Feiner
Vun sinstwuher kehrt dorschtig ei,
Und unner wunnerbarer Fleck,
Der hȧȧßt noch heit »Dreikünigseck«.