Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Johann Fischart

Aller Praktik Grossmutter

Ein dückgeprockte, jmmerwa^erende Prockdick,
durch Schwinhold Sewblůt, Obersten Stirn-
mauser Ko^enigs Gargantsus geprockt, or-
denlich wie man die Sa^ew bad, vnd
den Mist lad.

ALs man das Jar zeichnet mit einem gelegten kessel, oder einem Rincken mit seinem dorn, vnnd vier huffeisen, auch einer zimmeraxt, mit angehenckten zwo spindeln, zwen schmaltzha^efen vnnd zween kru^eg, ward dises geprochtiziert, durch den Mistalten pruchtizierer Weinhold Weinblůt, der den Sternen im glaß sach, auff alle volgende jar, vnnd za^ehlt man nach Raumkannischer vnnd gipwischer ziffer zwey tausendt Eyer, siben hundert Bratwürst, zwey vnnd achzig maaß ku^ehmost, vnd halt sich wie volget.

Diß jar würd ein Schalckjar sein von halb hundert gůten faul Montagen, auch dritthalb schlaafftrüncken. Darumb seind die scha^elck vnd Narren dis jar bald zeitig: Vnd die lüfft den ga^euchen vergifft, also das sie sich in die sta^ett vnd ha^euser zůleben werden begeben. Der Ro^emer zinßzal 0. 0. dann die steüwr würd schwa^erlich zůbekommen sein. Der Sonnen Circkel rund. Des Sontags bůchstab sůch man auff den Zünfften vnd stuben, mit Q. S. ist drey schilling Newer plappart, verzehrt Winhold Reinblůt, sagt des alten gelts ist wenig.

Zwischen Weinacht vnnd aller Narren faßnacht seind vngleiche wochen vnnd tag, Dann an eines Samstags abend kam jenem Schneider ein par strümpff zůpletzen, da er zů vor ein gantz woch war mu^eßig gesessen. Auch würd ettlichen lieben Menschen die nacht zů kurtz, vnd der tag zů lang sein, dargegen den faulen arbeitern, der tag zů lang, die nacht zu kurtz. Die gulden zahl, erzeigt sich bey den armen schmal.

Diß jar würt nur ein Mon sein, vnnd dannocht nicht New, dann es vil tausendt jar seind, daß jn Gott geschaffen hat, vnd darff niemand sorgen, das jhn der Wolff werd fressen, dann er ist jm zů hoch gesessen. 4 Wann der Himmel fa^ellt, so werden alle Vo^egel gefangen sein. Nach wind kompt regen, wann es regnet ists naß, glaubst du das? Nebelecht jar, macht fruchtbar gar. Cometen machen vil Propheten, vnd sagen all von to^edten, comede mein feisteten. Wer lang na^egel hat, würdt ein vortheil zůkratzen haben, doch den gründigen nicht wol bekommen, aber die Seckelabschneider wol frommen, so schneiden sie on ein fingerhůt nit in die finger. Grosse kinder werden schwa^erlich zůentwa^enen sein. Wann die natiuiteten war sind, so zieh keiner seine kind. Es wa^escht sich keiner selbst so scho^en, als wann er würd zům scherer gehn. Weisse Ha^end seind genůg gewaschen. Wann der Mist faul ist, würd er gůt an zůlegen sein, vnnd würd on den Arß nit geschehen ko^ennen. Artzeney mit tranck, bringt gestanck. Artzeney in gemein, kan nit nützlich sein. Dann wir haben nicht gleich gemein fleisch blůt vnd bein, ein jeder hat sein eigen la^euß, auch sein Narrenweiß. Confect infect, contrect inschlect, leckt biß ich auch mag.