Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Johann Fischart

Aller Praktik Grossmutter

Vom stand ettlicher leüth nach den Planeten.

DIe Ko^enig werden eben die Planeten im himmel haben, welche die bettler, dann auff der Ko^enigen kro^enung kein neuwe gestirn gescho^epfft seindt worden. Es sey Heintz oder Bentz, Colfactor oder Doctor, groß Hans oder klein Hans, da ist kein glantz.

Die dem Kindfresser Saturno vnderworffend seind, 8 als alles dürstiges gesindlein, vnd vngerhatene kindlein, daß mehr la^euß ha^elt dann par gelt, als daube, vnsinnige, wetterleünige leüt, Kerchelzieher, Sawbru^eer, Ka^emmetfeger, Mist, Most vnd Holtztra^eger, Hosenlepper, Schůchstepper, Todtengra^eber, Peltzweber, Würstler, Schůchlümmeltrager, Hundsschlager, Hundsdrecksamler, Alt Eisen vnnd Eschensamler, Hudelumper, Růbenbumper, Hu^ener vnd Würstfüller, Besemstieler, Schlegelflicker, Steinpicker, Ziegeiner, Ro^edelsteiner, Weinru^effer (ru^efft den wein auß, vnd trinckt er wasser zů hauß) Leimengraber, Seitenschaber, Hornschaber, Ofenpletzer, Zeichenschwetzer, Lederschinder, Weidenbinder, Wurmsamen Kra^emer, Salbenklicker, Reiffwickler, Laternenpletzer, Nußscheler, Kirschenzehler, Eseltreiber, Knapsa^eck, Stra^eubleinbeck, Partecksammler, Obstler, Stundaußru^effer, Suppengieser, Kuchesu^eser, Vnholden, Hexenmeister, Parillenseher, Landspeher, Milchsta^eler, Diebsha^eler, Bock vnd Gabelreüter, Zeichendeüter, Mantelfahrer, Schatzscharrer, Cristallengucker, Leimentretter, Zwillchgletter, Kerner, Ka^emmacher, Ortbandmacher, Klamperer, Kartetschenmacher, Fu^eterleinmacher, Zweckfeiheler, Laßeisenwetzer, Pflasterschleiffer, Oelpresser, Vnschlitsieder, Kuttelnwa^escher, Winckelmesser, Spinnenfresser, Senffmenger, vnd andere Melancholische dreckschlindige vnfla^etter, die werden nicht vil recht ha^endel treiben, vnd nicht alles empfangen, was sie gern erlangen, werden sich fast des Festes der kreüzerfindung behelffen, vnd oft sůchen la^euß da sie nicht beißt, Werden auch jhren speck nicht den Hunden geben, als ob sie es nicht bedo^erffen, noch vil Thaler nach der Katzen werffen. Dann nichts gewinnen, vil verthon, macht ein zůletzst betteln gohn. Es würdt das gelt viel Kauffmanschatz bey jhnen verhindern. Auch werden sie dasselbige gleich außtheilen, Ja wann die Sternenplacker, vnd Proctickprocker der lu^egen eins werden, vnd wann man ein sechtzigja^erigen Bader find, der nie geschwitzt hat, einen Warsager der nie gelogen hat, einen Koler der nie ist ru^esig worden, Fůhrleüt vnd Schiffleüt die nie geschworen haben, Betler die gůt kleider tragen, Mamalucken die recht glauben, Jůden die nicht durch wůcher rauben, Pfleger, Schaffner vnnd Amptleüt die in jhrem dienst verderben, Krancke die nicht gern 9 gesundt weren ohn sterben, Procuratoren die jr gůt für ander leüt versetzen, Hencker die niemandt verletzen, Kürßner die den beiß nit saltzen, Taglo^ener die nicht gern wolten, daß die Arbeyt schon wer vergangen, wann sie anfangen, Roßteuscher, vnd Kra^emer die nit liegen, Wa^echßler die nit betriegen, Ko^ech die nichts verschütten, Hůren von gůten sitten, Schreiber die nit radirn, Studenten die nit lieber hoffieren dan studieren, Münch die niemand verfu^eren, Ein troß on nasse knaben, Zehen Gelehrter vnd Formenschneider deren nit etlich bo^eß augen haben, Trucker die nicht gern Wein trincken: Ein dutzent Schneider darunder nit ettliche hincken, Metzger, Gerber, Seitenmacher, Oeler die nicht schmutzig sein: Schůchster, Nestler, Ferber die nicht wu^est na^egel haben, Kannengiesser, Schleiffer, Tra^eher, Schlosser, die nit kirren: Wirtt die nicht wasser vnder den wein schütten: Ma^egd die nicht Ha^efen brechen, Junge gesellen die nicht gern scho^ene Meidlein sehen, & contra von Jungfrawen die nicht gern scho^ene gesellen schawen, &c. Ja wan der Teüffel gestirbt, ist jm noch nicht weh, &c.

Kurtzumb den Armen werden die Engellotten auffzůwa^echßlen verbotten sein. Angesehen des Saturni steltzende retrogradation würd ein krippel vnd krummer vnflat im Spittal sterben, vnd werden die Erben nit viel vmb das Erb werben, noch schwartze Ro^eck darauff außnemmen.

Die vnder dem blo^eden Jupiter, als die zaghaffte gesellen, die nicht viel arbeyten wo^ellen, die ein schelmenbein haben im rucken, das sie sich nich gern bucken, die Neuwzeitung frager, die laßbrieff trager, hie wat nüws vom Tüffel, Ablaß kra^emer, Klosterschla^emmer, Stationirer, Hoffierer, Glockner, Herr Colfactor, Amptleüt die dem Fürsten geben ein Ey, vnnd nemmen dem gemeinen Mann zwey, paternostler, Ko^ernleinmacher, Kertzeka^euffler, Almuser oder Allmauser, Stattbüttel im dorff, Junckern von Adelstoltz, vnd Herren von dem leffelholtz, deller schlecker, Auch sonst mu^eßig lecker, Copisten, Bulisten, Mu^ench vnd Pfaffen, die viel thünchen vnd nichts schaffen, Nonnen vnnd klo^esterso^en, Einsidler, Gleißner Kirchenra^euber, Schreiber, Pergamentschaber, Beuelchhaber, Retscher, Rotschwetzer, 10 Pfulwentrescher, Papyrgletter, Notnarry, Schoffnar, Podagransgenossen, zwifach geha^eubelt bossen, Papyrsudler, vnd andere Hudler, werden nach gelegenheyt jres gelts leben, vnnd ettlich mehr kisten voll brieff oder staub haben dan voll gelts. Die Aduocaten werden dapffer das gelt aduociern vnd procuriern. Die Schreiber werden mehr gewinnen mit kauffen vnnd sitzen, dan ein Bott mit lauffen vnd schwitzen. Die weisse Herren werden schwartze Ro^eck verlassen. Mo^ench vnd Pfaffen werden mehr erschnappen mit singen, dan ein Aff vnnd Gauckler mit springen, O Brůder an ein Růder. Pfaffen die gern ho^eren kinder wein, Juden die gern wohnen bey den Schweynen, vnd Mo^ench die zů weltlich scheinen, Hencker so to^edten keinen, vnd Teüffel so nicht gern peinen, Müssen jhr art vnd eyd verneinen. Nicht jedes gleich ein handwerck heißt, was einen kleidet oder speißt, sonder was einen nehrt vnd ehrt, dasselb ein handwercks namen ho^ert. Kein volck würd meh mit der schwartzen dinten farben kunst erklittern vnd erklettern, dan die mit der federn. Es würd meh nutz eintragen ein Abt zů sein, dan ein schlechter Münch, darumb werden viel nach den Abteyen stellen lieber, dan nach dem vierta^egigen fieber. Ich will lieber eins Anthonier Münchs saw vnd bauch sein, dan sein bůch. Ettliche Trucker vnd Schreiber werden sich mehrtheils mit blossen worten ernehren. Die geistlichen werden offt singen vnd ru^effen, da sie lieber schlieffen, vnd betten lieber in betten. Sie werden sehr anda^echtig lesen allzeit, wan es lange gůtte opffer geyt, das sie als dan zů den Bu^echern der vier Ko^enig haben mu^essen, vnd solt es nur zwey bletter haben. Der Arm Priscianus würd sein fegfeüwr inn den Klo^estern haben. Den grossen Herrn werden viel auff dem fůß nachgehen, Vnd jnen lieber auff den kopff stehn. Zů hoff würd es nicht lang wol schmecken, sich schlaffen auff die kisten strecken (wann schon golt darinn leg) dann sie seind ein wenig ha^erter dan die federn. Die Schreiber vnd Notnarry solten wol bald verderben, wann man es also halten will, daß man keinem auff schermesser vnd papyrenwisch leihen will, er hab den bürgschafft vnd pfand, vnd das gelt in der hand. Zů hoff werden suppen vnd brieff liederlich zůbekommen 11 sein. Hu^et euch jr Jouisten, das podagram will zů eüch nisten, jr mo^echt eüch wol mit beltzen socken vnd krucken rüsten: Ey laßt eüch den wein mischen, ob jrs darmit verdüsten.