Du hast á wách's Betterl,
Voll Bleameln, voll Kraut,
Voll Bánderln, voll Máscherln, –
So schön hat's koan' Braut.

Viel Bámá bieg'n freundli
D' Händ' übá dih z'samm,
Und wácheln mi'm Láb,
Wann má's gar háß grad hab'n.

Dö Sunn' abá schaut dih halt
Áh gar z'gern an,
Und bleankátzt und guckt,
Wo s' durch d' Bládeln nur kann.

Und wo aus dö Weingárt't
Von'n Wiesnán nur her
Á Wásserl dir zuakann,
Da halt 's áh nix mehr:

Da wind't 's á sih ábi,
Und schmeichelt sih ein,
Und rutscht, eh' má's g'spannt,
So wie's is, in dih 'nein.

D' Vágißmeinnit, d' Veigerln,
Und Schmalzbleameln bieg'n
Sih übrá, und nipfen,
Und finden koan G'nüg'n.

Und d' Vögerln sán alli
Voll G'scháftigkeit da,
Und spitzen dö Schnáberln,
Und pecken dih a.

Und d' Grundeln dö schlierf'n
Bei dir ein und aus;
Du abá dátragst ás,
Und gehst drübá 'naus.

Da sán d' Stoan'ln kecká,
Dö halten dih auf,
Und wie 's d' áh wol murmelst,
Sö miark'n nit drauf.

So hupfst halt hübsch lüfti,
Als 's Schmálzel von all'n,
Bis d' drenten in's größárt
Wassá sollst fall'n.

Dös Wassá fürcht't schon
Ánmal all's in dá Geg'nd,
Weil's gar á so schiach is,
Und herfahrt, wann 's regn't.

Dir aber is's gnädi,
Und nimmt, nach dein'm Lauf,
Mit ausbrát'n silbánán
Armen dih auf.