Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Martin Opitz

Buch von der Deutschen Poeterey

Das III. Capitel

Von etlichen sachen die den Poeten vorgeworffen werden; vnd derselben entschuldigung.

AVß oberzehlten sachen ist zue sehen / wie gar vnverstendig die jenigen handeln / welche aus der Poeterey nicht weiß ich was für ein geringes wesen machen / vnd wo nicht gar verwerffen / doch nicht sonderlich achten; auch wol vorgeben / man wisse einen Poeten in offentlichen ämptern wenig oder nichts zue gebrauchen; weil er sich in dieser angenemen thorheit vnd ruhigen wollust so verteuffe / das er die andern künste vnd wissenschafften / von welchen man rechten nutz vnd ehren schöpfen kan / gemeinigleich hindan setze. Ja wenn sie einen gar verächtlich halten wollen / so nennen sie jhn einen Poeten; wie dann Erasmo Roterdamo von groben leuten geschahe. Welcher aber zur antwort gab: Er schätze sich dessen lobes viel zue vnwürdig; denn auch nur ein mittelmässiger Poete höher zue halten sey als zehen Philosophastri. Sie wissen ferner viel von jhren lügen / ärgerlichen schrifften vnd leben zue sagen / vnd vermeinen / es sey keiner ein gutter Poete / er musse dann zu gleich ein böser Mensch sein. Welches allerseits vngegründetes vrtheil ich kaum einer antwort würdig achte; vnnd jhnen alleine für das erste zue bedencken gebe / wer Solon / Pythagoras / Socrates / Cicero vnd andere gewesen / die sich doch des Poetennamens nie geschämet haben. Ich köndte auch sonsten viel vortreffliche leute erzehlen / die auff diese kunst (wo ich sie eine kunst nennen soll) jhren höchsten fleiß gewendet haben / vnd dennoch dem gemeinen nutze mit vnsterblichem lobe vorgegangen sind. So ist auch ferner nichts närrischer / als wann sie meinen / die Poeterey bestehe bloß in jhr selber; die doch alle andere künste vnd wissenschafften in sich helt. Apulcius nennet den Homerus einen viel wissenden vnnd aller dinge erfahrenen Menschen; Tertullianus von der Seele: einen Vater der freyen künste. Plato / welcher im Tragedien schreiben so weit kommen / das er auch andern kampff anbitten dörffen / hat vermischet / wie Proclus von jhm saget / τὴν τε Πυθαγόρειον καὶ Σωκρατικὴν ιδιότητα, die Pythagorische vnnd Socratische eigenschafft / hat die Geometrie vom Theodorus Cyreneus / die wissenschaft des Gestirnes von den Egyptischen Priestern erlernet / vnd ist aller dinge kündig gewesen. So hat man vnsere Musen zue mahlen pflegen / als sie mitt zuesammen gehenckten händen in einem reyen tantzten / jhnen auch den namen Μου̃σαι, gleichsam als ομου̃σαι, gegeben / das gemeine bandt vnd verwandtschafft aller künste hierdurch an zue deuten. Wann auch die verse nur blosse worte sindt / (wiewol das so wenig möglich ist / als das der Cörper ohne die Seele bestehen könne) was ist es denn das Eratosthenes ein getichte von beschreibung der Welt / so Hermus geheissen / das Parmenides vnnd Empedocles von natur der dinge / das Seruilius vnd Heliodorus / derer Galenus erwehnet / von der ärtzney geschrieben haben? Oder / wer kan leugnen / das nicht Virgilius ein gutter Ackersman / Lucretius ein vornemer naturkündiger / Manilius ein Astronomus, Lucanus ein Historienschreiber / Oppianus ein Jägermeister / vnd einer vnd der andere der Philosophie obristen sein / da sie doch nichts als Poeten sein. Es sey denn das wir glauben wollen / Theocritus habe Schaffe getrieben / vnd Hesiodus sey hinter dem Pfluge gegangen. Doch muß ich gleichwol bekennen / das auch an verachtung der Poeterey die jenigen nicht wenig schuldt tragen / welche ohn allen danck Poeten sein wollen / vnd noch eines theils zum vberfluß / ebener massen wie Julius Cesar seine kahle glitze / sie jhre vnwissenheit vnter dem Lorbeerkrantze verdecken. Gewißlich wenn ich nachdencke / was von der zeit an / seit die Griechische vnd Römische sprachen wieder sind hervor gesucht worden / vor hauffen Poeten sind herauß kommen / muß ich mich verwundern / wie sonderlich wir Deutschen so lange gedult können tragen / vnd das edele Papir mit jhren vngereimten reimen beflecken. Die worte vnd Syllaben in gewisse gesetze zu dringen / vnd verse zue schreiben / ist das allerwenigste was in einem Poeten zue suchen ist. Er muß ευφαντασιωτός, von sinnreichen einfällen vnd erfindungen sein / muß ein grosses vnverzagtes gemüte haben / muß hohe sachen bey sich erdencken können / soll anders seine rede eine art kriegen / vnd von der erden empor steigen. Ferner so schaden auch dem gueten nahmen der Poeten nicht wenig die jenigen / welche mit jhrem vngestümen ersuchen auff alles was sie thun vnd vorhaben verse fodern. Es wird kein buch / keine hochzeit / kein begräbnüß ohn vns gemacht; vnd gleichsam als niemand köndte alleine sterben / gehen vnsere gedichte zuegleich mit jhnen vnter. Mann wil vns auff allen Schüsseln vnd kannen haben / wir stehen an wänden vnd steinen / vnd wann einer ein Hauß ich weiß nicht wie an sich gebracht hat / so sollen wir es mit vnsern Versen wieder redlich machen. Dieser begehret ein Lied auff eines andern Weib / jenem hat von des nachbaren Magdt getrewmet / einen andern hat die vermeinte Bulschafft ein mal freundtlich angelacht / oder / wie dieser Leute gebrauch ist / viel mehr außgelacht; ja deß närrischen ansuchens ist kein ende. Mussen wir also entweder durch abschlagen jhre feindschafft erwarten / oder durch willfahren den würden der Poesie einen mercklichen abbruch thun. Denn ein Poete kann nicht schreiben wenn er wil / sondern wenn er kan / vnd jhn die regung des Geistes welchen Ovidius vnnd andere vom Himmel her zue kommen vermeinen / treibet. Diese vnbesonnene Leute aber lassen vns weder die rechte zeit noch gelegenheit: wie sich denn Politianus in einer epistel hefftig darüber beschwäret / vnd Ronsardt / wie Muretus meldet / hat pflegen zue sagen / er empfinde nicht so grosse lust wann er seine eigene Liebe beschriebe / als er grossen verdruß empfinde / wann er anderer jhre liebe beschreiben muste. Wiewol etliche / gemeiniglich aber die schlimmsten / sich selber hierzue antragen / vnd den leuten jhre träwme fast einzwingen. Diese meinet sonderlich Aristoteles / Eth. ad Nic. lib. 9. c. 7. da er saget / das sie jhre getichte vber die maße lieb haben / vnd so hertzlich gegen jhnen geneiget sein: wie die eltern gegen den kindern. Vnd Cicero 5. Tusc. spricht auch fast auff diesen schlag: In hoc enim genere nescio quo pacto magis quam in aliis suum cuique pulchrum est. adhuc neminem cognoui Poetam, & mihi fuit cum Aquinio amicitia, qui sibi non optimus videretur. Das ferner die Poeten mit der warheit nicht allzeit vbereinstimmen / ist zum theil oben deßenthalben Vrsache erzehlet worden / vnd soll man auch wissen / das die gantze Poetery im nachäffen der Natur bestehe / vnd die dinge nicht so sehr beschreibe wie sie sein / als wie sie etwan sein köndten oder solten. Es sehen aber die menschen nicht alleine die sachen gerne / welche an sich selber eine ergetzung haben; als schöne Wiesen / Berge / Felde / flüße / ziehrlich Weibesvolck vnd dergleichen: sondern sie hören auch die dinge mit lust erzehlen / welche sie doch zue sehen nicht begehren; als wie Hercules seine Kinder ermordet / wie Dido sich selber entleibet / wie die Städte in den brandt gestecket werden / wie die pest gantze Länder durchwütet / vnd was sonsten mehr bei den Poeten zue finden ist. Dienet also dieses alles zue vberredung vnd vnterricht auch ergetzung der Leute; welches der Poeterey vornemster zweck ist. Die nahmen der Heidnischen Götter betreffendt / derer sich die stattlichsten Christlichen Poeten ohne verletzung jhrer religion jederzeit gebrauchet haben / angesehen das hierunter gemeiniglich die Allmacht Gottes / welcher die ersten menschen nach den sonderlichen wirckungen seiner vnbegreifflichen Maiestet vnterschiedene namen gegeben / als das sie / wie Maximus Tyrius meldet / durch Minerven die vorsichtigkeit / durch den Apollo die Sonne / durch den Neptunus die Lufft welche die Erde vnnd Meer durchstreichet; zuezeiten aber vorneme Leute / die wie Cicero im andern buche von den Gesetzen saget / vmb jhres vordienstes willen in den Himmel beruffen sein / zue zeiten was anders angedeutet wird / ist allbereit hin vnd wieder so viel bericht darvon geschehen / das es weiterer außführung hoffentlich nicht wird von nöthen sein. Was auch der Poeten Leben angehet / (damit ich mich nicht zue lange auffhalte) ist es nicht ohn / das freylich etliche von jhnen etwas auß der art schlagen / vnd denen / die in anderer Leute mängeln falcken / in jhren eigenen Maulwörffe sein / anlaß geben jhnen vbel nach zue reden. Die Vrsache kan wol zum theile sein / das jhre Poetische gemüter vnterweilen etwas sicherer vnd freyer sein / als es eine vnd andere zeit leidet / vnd nach des volckes Vrtheil nicht viel fragen. Zum theile thut auch der wein etwas; sonderlich bey denen / welche Horatius besser gefellt da er schreibet:

Als Pindarus / der stracks im anfange seiner bücher saget: ’Άριστον μὲν ύδωρ, Das Wasser ist das beste das man findt. Mit welchem es Alceus / Aristophanes / Alcman / Ennius vnd andere nicht gehalten hetten; auch Eschilus nicht / dem Sophocles vorgeworffen / der wein hette seine Tragedien gemacht / nicht er. Vnd zum theile thut auch zue dem etwas nachleßigen wandel mancher Poeten nicht wenig die gemeinschafft etlicher alten / die jhre reine sprache mit garstigen epicurischen schrifften besudelt / vnd sich an jhrer eigenen schande erlustiget haben. Mit denen wir aber vmbgehen mußen wie die bienen / welche jhr honig auß den gesunden blumen saugen / vnd die gifftigen Kräuter stehen lassen. Doch wie ehrliche / auffrichtige / keusche gemüter (welche von den auch keuschen Musen gefodert werden) derer die jhre geschickligkeit mit vblen sitten vertunckeln nicht entgelten können / so sind auch nicht alle Poeten die von Liebessachen schreiben zue meiden; denn viel vnter jhnen so züchtig reden / das sie ein jegliches ehrbares frawenzimmer vngeschewet lesen möchte. Man kan jhnen auch deßentwegen wol jhre einbildungen lassen / vnd ein wenig vbersehen / weil die liebe gleichsam der wetzstein ist an dem sie jhren subtilen Verstand scherffen / vnd niemals mehr sinnreiche gedancken vnd einfälle haben / als wann sie von jhrer Buhlschafften Himmlischen schöne / jugend / freundligkeit / haß vnnd gunst reden. Wie dann hiervon der Frantzösischen Poeten Adler Peter Ronsardt ein artiges Sonnet geschrieben / welches ich nebenst meiner vbersetzung (wiewol dieselbe dem texte nicht genawe zuesaget) hierbey an zue ziehen nicht vnterlassen kan:

Welchen namen wenn die Poeten nicht zue gewarten hetten / würden viel derselben durch die boßheit der Leute / die sie mehr auß neide alß billiger vrsache verfolgen / von jhrem löblichen vorsatze zuerücke gehalten vnd abgeschreckt werden. Es wird aber bey jhnen nicht stehen / vnd ich bin der tröstlichen hoffnung / es werde nicht alleine die Lateinische Poesie / welcher seit der vertriebenen langwierigen barbarey viel große männer auff geholffen / vngeacht dieser trübseligen zeiten vnd höchster verachtung gelehrter Leute / bey jhrem werth erhalten werden; sondern auch die Deutsche / zue welcher ich nach meinem armen vermögen allbereit die fahne auffgesteckt / von stattlichen gemütern allso außgevbet werden / das vnser Vaterland Franckreich vnd Italien wenig wird bevor dörffen geben.