Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Walther von der Vogelweide

Deutschlands Ehre

Ir sult sprechen willkomen:
Der iu maere bringet, daz bin ich.
Allez, daz ir habt vernomen,
Daz ist gar ein wint: nu vraget mich.
Ich aber wil miete:
Wirt min lon iht guot,
Ich sage iu vil lihte, daz in sanfte tuot.
Seht, waz man mir eren biete.

Ich wil tiuschen frowen sagen
Solhiu maere, daz si beste baz
Al der werlte suln hehagen:
Ane groze miete tuon ich daz.
Waz wold ich ze lone?
Sie sint mir ze her;
So bin ich gefüege, und bite sie nihles mer,
Wan daz si mich grüezen schone.

Ich han lande vil gesehen,
Unde nam der besten gerne war:
Uebel müeze mir geschehen,
Künde ich ie min herze bringen dar.
Daz im wol gevallen
Wolde fremeder site.
Nu waz hulfe mich, ob ich unreht strite?
Tiuschiu zuht gat vor in allen.

Von der Eibe unz an den Rin
Und her wider unz an Ungerlant.
So mugen wol die besten sin.
Die ich in der werlte han erkant.
Kan ich rehte schouwen
Guot gelaz unt lip,
Sem mir Got, so swüere ich wol, daz hie diu wip
Bezzer sint, danne ander frouwen.

Tiusche man sint wol gezogen,
Nehte als engel sint diu wip getan.
Swer si schildei, derst betrogen;
Ich enkan sin anders niht verstan.
Tugent und reine minne,
Swer die suochen wil,
Der sol komen in unser lant; da ist wünne vil.
Lange müeze ich leben dar inne!