Arien und Bänkel aus Altwien

von J. B. Moser.

Es gibt in uns'rer Zeit … Wohl auch noch junge Leut',
Doch was wir zwa für Kampeln g'wesen san;
Was wir vor zwanzig Jahr'n … Noch für Hallotri war'n,
So zwa gibt's unter Tausend aft nöt An'n. –
Packschierlich g'wachsen … Die Köpf voll Faxen,
Zum Zwergel z'groß und zum Riesen z'klan;
Für fremde Schmerzen … Patzweiche Herzen
Und Roccoco-Wadeln, wie a Stan.

Noch in die Kinderschueh … Sein wir in aller Frueh',
Wann unsre Mütter uns in d'Schul hab'n g'schickt;
Anstatt hinein, um's Eck … Hübsch weit vom Schulhaus weg,
Nur daß uns kein Bekannter hat erblickt.
Haben uns're Bücher … In d'Nasentücher,
Daß uns nöt ausrauben than, versteckt;
Uns wie die Haasen … Mit'n Bauch auf'm Rasen,
Die Köpf in d'Höh g'halten, niederg'legt. –

A Jed'r a G'stömm im Sack … Und weil der Rauchtabak
Für uns're Magen noch nöt recht hat taugt,
Und uns – kaum neugebor'n … Gleich d'rauf nöt guet is word'n,
So hab'n wir Nuß- und Weichselblätter g'raucht.
Das war ein G'stanken … Den schwächsten Kranken
Hätts aus seinem Bett außig'jagt vors Thur;
Doch uns entsprochen … Hats g'schmeckt und g'rochen
Wir haben nöt auffischnupfen können g'nur.

Und wie wir aus der Lehr … Hab'n glaubt, itzt sein wir Wer,
Und habn ein'n Stock und Pfeifen dürfen trag'n;
Und uns zu ält're Gsell'n … Hab'n dürfen zuchistell'n,
Und d' Meister Sö! zu uns hab'n müssen sag'n.
So hab'n wir schleuni … A jeder Seini,
Uns Madeln aufgabelt alle zwa;
Und sein in Prater … Mit Sö – wie Vater
In d' Mutter eing'hängter gangen a. –

Und wie wir so spatzier'n … Und unsre Madeln führ'n,
Bleibt auf einmal Einer vor uns steh'n;
Und schreit so laut er kann … Schaut's die zwei Mistbueb'n an,
Anstatt in d'Christenlehr, mit'n Menschern geh'n.
Nimmt – drauf noch kecker … Uns d'Madeln wegger,
Und wir, wie Primsenkas im Gsicht vor Schand;
Wir wollten kana … Der erste wana
Und hab'n's verhalten nach einander zahnt.

Doch was vor zwanzig Jahr … Für uns so schmerzlich war,
Und wo wir uns so g'schamt hab'n vor die Leut',
Das machet mir und den … Wann wir mit unsre Schön'n
Am Arm, in Prater gengen, itza a Freud. –
Denn statt daß Ana … Von uns thät wana,
Wär Jeder froh, wann a Kecker kam;
Und mir die Meine … Und dem die Seine
Und als a eing'hängter weggernahm'. –