Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

's Werschtel.

's isch schwer vun Mittags an bis Nacht
So drucke rum zu laafe,
Drum geh' ich manchmol, wann sich's macht,
Am vier e Schoppe kaafe.
Heut waren grad bekannte Leut
Am runde Disch gesesse;
No, denk ich guck – du kannscht aach heut
Glei was zu Owend esse.
Ich ruf de kleene Kellner her
Un trink mei Rescht inzwische;
Dann sag ich: »Schorsch, mei Glas isch leer,
Geh, hol mer noch en frische;
Dann bring mer, wie ich sunscht als hab,
E Werschtel, vun de zarte –
Da – hoscht en Gulde, zieh's glei ab
Un loß mich nit lang warte!«

»»Ja, sägt er, glei im Aageblick –
's kummt frisches aus'm Keller!««
Er geht un kummt dann aach zurück,
E Werschtel uf'm Deller.
Do war ke Stückel Haut meh druff,
Verroppt, verfetzt, verrisse –
»Nä, sag ich, do hört Alles uff,
Des hot die Katz verbisse!«
Ich hab de Kellner angeguckt
Un loss en nimmeh springe –
»Was, sag ich, Kerl, du bischt geschuckt,
Wie kammer so was bringe?
»»Ja, sehn se, sägt er, des isch schad«
Un lacht aach noch, des Berschtel –
»Sie hän doch vorhin selbscht gesat:
Zieh's a glei ab, des Werschtel!««