Maurus Lindemayr: Gedichte

Schmidsepperl, han bist du a Fuhrman?
Du Schlankl is das a Manir?
Dein Füchsel, als lag da grads nix dran,
mueß losen und du sitz'st ban Bir.

So bald da heunt d Augn Sand afganga,
so hast schan an d'Bierbütschen dacht.
Zan Fischfrössen kam dar da Blanga,
a sodl hast 's Fruehgebeth g'macht.

Nachst hiet ja a Kueh muessen lacha,
farst her mit an eingsperrten Rad:
Hast nöt g'hert, was d'Buebm hintennacha
dösthalbn für a Glachta habn ghat?

Da Fuchs zug si schier aus'n Athen
und hiet iehm 'n Bauh schier bald z'sprengt.
Af d'Löst hat's halt gleiwohl no g'rathen,
daß d'bald hast Traunkiera dalengt.

Was war für a Rand z'Gaspatshofen!
Da Pfarra hat d'Krachsen anpackt
mit Ziegeln, mit Tuftstein und Schrofen.
Mein Sepperl, wie hast di da plagt!

Hast g'meint, ös sand Ödlgstein drinna
und trag'n, daß da d'Ripp'n als g'kracht.
Af d'Löst hast kam schnauern mehr kinna
und diernt nix als Steintrümma bracht.

Dein Herzensfreund und Himmelbrueda
haißt Michl da Bluetschöri z'Haag.
Da wölhi aus enk dös gröst Lueda,
wer mehra mag sauffen, is d'Frag.

Mi wunert na grad, daß 's ban Schmiden
noh nöt af den Punkten habn denkt
und daß di ban Handwerk habet glitten,
walst d'Geiß an an Bam hast afghengt.