Hans Staden: Warhaftige Historia

Wie das ander schiff vnser geselschafft
ankam / so sich im Meer von vns verloren hatt / darin
der Oberste Steuerman war. Cap. xi.

WJe wir vngeferlich drei wochen daselbst gewesen waren / kam das schiff / darin der oberste steurman war / Aber das dritte schiff war vmbkommen / daruon erfuhren wir weitter nichts.

Wir ruesteten widerumb zû fort an zufaren / hatten victalia versamlet fuer 6. Monat / dann wir hatten noch wol 300 meil zu wasser zufahren. Wie wir alle ding fertig hatten / eynes tages verloren wir das grosse schiff im hauingen / das die reyse also verhindert warde.

Wir lagen da zwey jar in grosser gefar in der wiltnus / lieden grossen hunger / musten eydexen vnd feld Ratten essen / vnd andere seltzame getier mehr so wir bekommen konten / auch wasser schneln so an den steinen hangen / vnd der gleichen mer seltzamer speise. Die wilden so vns erstmals Victalia gnug zutrugen / wie sie wahr gnug von vns bekommen hatten / entzog vns der meynste hauff auff ander oerter / dorfften jnen auch nit wol vertrawen / so das es vns verdroß da zuleigen vnd vmb zukommen.

Wurden derhalben eyns das der meynste hauff solte vber landt dahin zur Prouintz / die Sumption genant / reysen / welchs noch war. 300. meil von dannen / Die andern solten mit dem vberbliebenen schiff dahin kommen / Der Capitan behielt vnser etlich bei sich / solten mit jm vber wasser fahren / Die jenigen so vber landt zohen / namen Victalia mit / durch die wiltnis zuzihen / namen etlich Wilden mit sich / zohen hin / aber jrer vil waren von hunger gestorben / die vbrigen waren zur stette kommen / wie wir darnach erfuren / Vns andern war das schiff auch zukleyn vber Meer zufaren.